Winnoar kleurploatenwedstried Wiesneus 2021 bekend

Dit joar konden basisschoulen in aanloop noar de Meertmoand Streektoalmoand de daarde editie van de Wiesneus aanvroagen veur de leerlingen. In t tiedschrift Wiesneus stoan verhoalen, laidjes, gedichten en recepten, apmoal schreven in t Grunnegs. Leerkrachten kinnen de Wiesneus bruken in de klas. Dit joar is bie t tiedschrift ook n spezioale lesbraif mit extroa Grunnegs materioal ontwikkeld. Kinder kinnen deur beveurbeeld verhoalen te lezen en laidjes zingen kennismoaken mit t Grunnegs.

Kleurploat
Basisschoulkinder konden dizze moal ook mitdoun mit n poar Wiesneus priesvroagen, doaronder n spezioale kleurploatwedstried. Centrum Groninger Taal & Cultuur, de initiatiefnemer van de Grunneger Wiesneus, het per post hail veul mooie en vroleke kleurploaten kregen. Geweldeg en veur elk dij mitdoan het: Stief bedankt veur joen biedroagen! Mor wel het de mooiste kleurploat moakt?

Riemke Bakker, bestuurslid van Centrum Groninger Taal & Cultuur, moakt in dit filmpke de winnoar van de kleurploatwedstried bekend!

Ankomende week op dunderdag zeggen wie wel de winnoar van de Wiesneus Puzzel worden is. Hol hierveur ons webstee en socials in de goaten!

Wiesneus is n initiatief van Huus van de Taol, Centrum Groninger Taal & Cultuur, IJsselacademie, Twentehoes en Erfgoedcentrum Achterhoek en Liemers. t Kindermagazine wordt in verschillende streektoalvarianten oetbrocht. Basisschoulen kinnen de Wiesneus elk joar vanof dezember vergees aanvroagen. t Tiedschrift kin realiseerd worden deur n financiële biedroage van de pervinzie Grunnen.

Kiek ook op de Klunderloa webstee http://www.klunderloa.nl/ veur meer Grunneger lesmaterioal, laidjes, verhoalen en gedichten, spezioal veur basisschoulen in Grunnen.