‘Wiesneuzen’ Floris en Rayen wint tablet met streektaalpuzzel

Floris Prins van basisschole ’t Bastion in Bredevoort en Rayen Klein Gotink van Dorpsschool Halle wonnen de eerste pries veur ’t good oplossen van ‘t  Wiesneus-woorddiagram en de woordzeuker. Ze kregen beiden een mooien tablet, den maondagochtend op schole werd uut ereikt deur Femia Siero, directeur van Erfgoedcentrum Achterhoek en Liemers. 

De winnaars wissen nargens van en werden dan ok onmundig verrast deur Femia Siero, den de prieze persoonlek kwam aoverhandigen op beiden scholen.  Ok Diana Abbink, projectleider streektaal bi-j ‘t ECAL, was d’r bi-j. Floris Prins en Rayen Klein Gotink waren twee van de völle kinder dee de oplossing van ’t woorddiagram of de woordzeuker in Wiesneus instuurden. Hun namen werden uut de hogen hood, met daorin de naamkaartjes van alle goeie inzenders, e trokken. Zee wonnen dus ’n mooien tablet, hun klasgenootjes kregen baovendien een pette met daorop ‘Ik praot plat’.

Wiesneus veurstelling

Veur ’t viefde jaor op riege trokken metwarkers van de Bibliotheek af elopen maonden langs Achterhoekse basisscholen um ’n Wiesneus-les te geven. Tiedens dit uurtjen maakt kinder uut groep 5, 6 en 7 op een spölse maneere kennis met de streektaal. Bi-j de les heurt ’t tiedschrift Wiesneus, waorin leuke verhale, puzzels, opdrachten en leedjes staot. Natuurlek allemaole in ’t plat!

Dit jaor wordt Wiesneus af eslotten met ’n prachtegen muzeekveurstelling van Peter en de Wolf. ’t Verhaal wordt daorbi-j veur elaezen in ’t Achterhooks. ’t Stuk wordt espöld op 25 september in openluchttheater Engbergen in Voorst en op 9 oktober in Theater ’t Spieker in Eibergen. Disse veurstellingen bunt gratis en veur niks te bezuuken veur alle kinder en hun olders of grootolders.

>> Kaartjes zijn (tzt) te bestellen via de websites van beide theaters. Of kijk op www.ecal.nu/Peterendewolf voor meer informatie.