Verhalenwedstried ‘De gele taofel’

Het Huus van de Taol organiseert een schriefwedstried veur het hiele Nedersaksische taolgebied. Elkenien mag in zien eigen streektaol schrieven, variërend van Grunnings tot Achterhoeks.* Der bint twei categorieën: groten en jeugd van 12-18 jaor.

Het thema van de verhalenwedstried is ‘De gele taofel’. Stel je een gele taofel veur. Waor stiet hij? Zit der mèensen an? Wat speult zich of in de ruumte waoras de taofel stiet? De taofel kan een belangrieke rol in het verhaal speulen of op de achtergrond blieven. Hoe dan ok: bedèenk een origineel verhaal waoras een gele taofel in veurkomp.

De eerste pries is een dinerbon um te taofeln veur 250 euro. De tweide pries is een dinerbon van 100 euro. De jeugdpries is een set Apple Airpods Pro. Winnende verhalen wordt publiceerd in het tiedschrift Zinnig.

De jury bestiet oet mèensen oet verschillende dielen van het Nedersaksische taolgebied. De wedstried wordt organiseerd deur het Huus van de Taol (Drenthe) in samenwarking met de Overijsselacademie, het Centrum Groninger Taal & Cultuur, de Stellingwarver Schrieversronte en het Erfgoedcentrum Achterhoek Liemers. De jury beoordeelt de verhalen objectief; zunder vermelding van de naam van de schriever.

*Het Nedersaksische taolgebied bestiet oet Grunning, Drenthe, Overiessel, de Gelderse regio’s Veluwe en Achterhoek, Urk en de Stellingwarven.

Veurwaarden:

• Het verhaal is schreven in ien van de streektaolen die under het Nedersaksisch valt
• De inzending hef niet meer as 1250 woorden
• Het verhaal is origineel en is niet eerder publiceerd. De tekst möt veur 1 febrewari 2022 binnen weden bij: info@huusvandetaol.nl met in de underwarpbalk: schriefwedstried
• Dielnimmers stuurt maar ien inzending in en gaot in geval van winnen akkoord met plaotsing in het tiedschrift Zinnig
• Dielnimmers an de jeugdwedstried zet bovenan hun verhaal: ‘jeugd’ en schrieft daorachter hun leeftied.

As der van je streektaol een spelling vastlegd is, dan bint wij bliede aj die gebruukt. Maar hoe dan ok reken wij je niet op de spelling of.

‘Papieren zak op taofeltie’ (74 x 46 cm) deur Piet Sebens, Groningen