Streektaalles Wiesneus veur kindere van de basisscholen

Dit jaor wordt veur de veerde kere dialectlessen egevven op basisscholen in den Achterhook, en alle leerlingen dee-t metdoot kriegt ’t blad Wiesneus. In ’t blad dat dit jaor ’t thema “In bewaeging” hef, könt kindere spöllenderwieze kennis maken met de streektaal en leren laezen, luusteren en spöllen. In ’t blad staot verhalen, leedjes, ne zeukplate, strips en nog völle meer, allemaole in ’t Achterhooks!

In Wiesneus wordt de streektaal as ne volweerdege taal onder de andach ebrach, net as standaard Nederlands. Dit is belangriek vanuut ’t culturele aspect, maor ok veur de algemene taalontwikkeling.

Vanaf april 2021 wordt ’t project uut-evoerd deur de consulenten van de bibliotheken West-Achterhoek, Oost- Achterhoek, Achterhoekse Poort en Montferland. Veureg jaor hebt 70 scholen in uns gebied met-edaone. In verband met Corona wordt de lessen dit jaor ovver ne langere periode uut-esmeerd, de lessen loopt deur töt in ’t naojaor en scholen könt zich nog altied anmelden.

Wiesneus is oorspronkelek een initiatief van ‘t Huus van de Taol in Drenthe, wi’j gebroekt hier de Achterhookse vertaling. Belangstellenden könt informatie opvraogen via info@ecal.nu. De nieje en veurgaonde Wiesneuzen en ondersteunend materiaal veur de lessen, zoas leedjes, teksten en filmpjes, bunt te vinden op www.wiesneus.nl