Schriever Martin Koster hef een lintie kregen

Mooi neis veur schriever Martin Koster oet Lievern: hie kreeg maondagmörgen een lintie en is nou Ridder in de Orde van Oranje-Nassau. Koster kreeg het lintie veur zien, zoas  burgemeester Klaas Smid zee, ‘niet te underschatten inzet veur de Drentse streektaol’. Koster zölf har het lintie niet verwacht. Zien reactie was dus ok kört: ‘Ik heb niks veurbereid, dus ik zeg maor niks’. Al was e der wal hiel wies met.

Koster was in 1979 ien van de oprichters van het letterkundig tiedschrift Roet, waor e tot 2000 hoofdredacteur van west hef. Ok was e columnist veur de Drentse Courant en later het Dagblad van het Noorden.

In de jaoren ’90 hef e metholpen met de coördinatie en samenstellingen van verscheiden Drentse taolcursussen. Ok was Martin ien van de initiatiefnimmers van het Nei Drèents Geneutschap. Het NDG hef zuch achter de schermen inzet veur allerlei zaken op het gebied van de Drentse taol, waorunder de oprichting van oeze eigen streektaolorganisatie.

Koster was ok betrökken bij het ontstaon van Taal an Taofel; vier maol in de winter een zundagmörgen met streektaol. En die streektaol was altied een combinatie van meziek, proza en poëzie.

As schriever van boeken hef e ok zeker niet stilzeten, kiek maor ies op zien schrieverspagina!

Dat lintie is dus dik verdiend!

Foto: RTV Zulthe