Prieswinnaars Wiesneus bint bekend

Kleurplaoten en puzzels oet het streektaoltiedschrift levert 7 winnaars mooie priezen op

Vleden meertmaond is het streektaoltiedschrift Wiesneus van streektaolorganisatie Huus van de Taol weer naor de basisschoelen bracht. Zo kunden zowat alle kinder in Drenthe zuch vernuvern met de verhaolen, gedichten, puzzels en kleurplaot. Veur de puzzels en de kleurplaot bint nou de inzendingen bekeken en hef de jury 7 priezen verdeeld.

De woordzuker har as oetkomst de zin ‘Dreumen in het Drents’. De priezen veur de goeie oplössing gaot naor Wouter de Roos (12) van CBS De Fontein oet Dwingel en Jim Kreuze (7) van de Mr. Harm Smeengeschoel oet Beilen.

De invulpuzzel har as oetkomst ‘dreumpries’. Dat wussen Tycho van der Veen (5) oet Paais en Sanna van der Spoel van CBS De Borgh in Börger ok.

Veur de kleurplaot hef de jury drei winnaars keuzen: Noor Gils (4) van De Lindelaar in Börk, Jens Harring (8) van De Borgh in Börger en Pure Walthuis (11) van OBS Oostenbrink in Hollandscheveld

Daornaost kriegt alle prieswinnaars ok een kinderboek van het Huus van de Taol. Ze kriegt persoonlijk en via de schoel bericht.

Digitaal is alles over het tiedschrift ok te vinden op www.wiesneus.nl, op dizze website kan het hiele jaor deur speulenderwies Drents leerd worden.

Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers groots op bint en die de niet-gebroekers waardeert.