Niej Achterhooks lespakket veur basisscholen

Samenwarking Rijksuniversiteit Groningen, Zwarte Cross, NWA en ECAL

Niej Achterhooks lespakket veur basisscholen

D’r kump ’n niej Achterhooks lesprogramma veur basisscholen. Dat niejs is vandage epresenteerd op de persdag van de Zwarte Cross. Organisator Feestfabriek hef ‘t  lespakket ontwikkeld samen met Rijks Universiteit Groningen (RUG), de Nationale Wetenschapsagenda (NWA) en Erfgoedcentrum Achterhoek en Liemers (ECAL). Bi-j ’t lesprogramma heurt ’n app, dissen is noe al te downloaden. ‘t  Lesprogramma is gratis deur scholen an te vraogen en vanaf oktober te gebruuken. ’t Doel van dit alles: kinder kennis laoten maken met onzen mooien streektaal en ‘t plat praoten stimuleren!

’t Is al jaoren ’n wens um meer streektaal in ’t onderwies te implementeren. Jong eleerd is tenslotte old edaone! Niet allene ‘t ECAL mek zich hier hard veur, dat doot ok de Zwarte Cross en Rijks Universiteit Groningen. Zee hebt noe hunne krachten ebundeld en, efinancierd deur de NWA, ‘n Achterhooks lespakket ontwikkeld: Van Old naor Jong: Achterhooks.

Dis ‘n tien wekken tellend lesprogramma waorin kindervan groep 7 en 8 van de basisschole spöllenderwies leert aover en op zuuk gaot naor Achterhookse woorden en de verschillen dee d’r bunt in dialecten van darp tot darp . Hierbi-j könt ze gebruuk maken van ’n speciaal ontwikkelden app, ‘t digitale WALD (Woordenboeken Achterhoek en Liemers), Tante Rikie’s onmundig mooie verhalenboek en ‘n haevigen videoserie den de Feestfabriek hef ontwikkeld als lesmateriaal.

App Van Old naor Jong: Achterhooks

Bi-j ‘t lesprogramma met leskaarten heurt ‘n gratis app waorbi-j alle schoolkinder, maor ok anderen die dit leuk vindt, spöllenderwies Achterhooks kunt leren. De app is ontwikkeld deur promovendus Wietse de Vries van de RUG, onder leiding van professor Martijn Wieling, Biezunder hoogleraar Nedersaksische Taal en Cultuur. Het ECAL hef de Achterhookse inbreng eleverd en de verhaaltjes in de app in esprokken. De app (Van Old naor Jong: Achterhooks) is beschikbaor veur zowel Apple als Android en de eersten versie is vanaf noe te downloaden in de verschillende app stores. De lespakketten könt deur alle basisscholen an evraaogd worden en bunt helemaol gratis.

Meld ow an!

Meer informatie aover ‘t lespakket is te vinden op www.rug.nl/achterhooks. Scholen könt zich hier ok anmelden veur ‘t gratis lespakket. Dissen is vanaf oktober beschikbaor en umvat o.a. ‘n lerarenhandleiding, leskaarten, posters en Tante Rikie’s onmundig mooie verhalenboek met (audio) veurlaesverhaaltjes.