Al meer as 25 jaor is de combinatie van Drentse schrieverij & meziek en eten geliefd. In het neie seizoen kuj op acht zundagen naor Taal an Taofel in Dwingel en Noord-Slien.

BEILEN – Vrijwilligers van streektaolorganisatie het Huus van de Taol bint drok gangs met de veurbereidingen van het neie seizoen van Taal an Taofel. Op acht zundagen in de winter kunt bezukers naor streektaolschrievers luustern. En ok is der altied meziek en tussen de middag waarm eten.

Taal an Taofel is aal in dezölfde zaolen: Grand Café De Brink in Dwingel en Restaurant-Zalencentrum Wielens in Noord-Slien. Op zundag 16 oktober is de oftrap in Dwingel. Het publiek kan luustern naor poëzie en verhaolen in de streektaol van Henk Huinink en Cathrien Thalen. De meziek komp van Harold Habing. Hie was dielnimmer van het Drèents Liedtiesfestival 2022 en hef net zien eerste CD prissenteerd. Op 23 oktober kuj naor Noord-Slien. Bezukers kunt dan genieten van poëzie en verhaolen in de streektaol van Eddie Zinnemers en Hennie Kuijer. De meziek komp van Grunniger Fries Wolma.

In de middagpauze kan elkenien naor het warm buffet. Taal an Taofel begunt um 11.00 uur en stopt um 14.00 uur. De entree is € 20,00. En daor kriej dan koffie/thee en een waarme maoltied veur.

In Dwingel is Taal an Taofel op 16 oktober, 13 november, 5 febrewari (2023) en 12 meert (2023). Risserveren kan via ans.klok@ziggo.nl of j.oosting01@home.nl.

In Noord-Slien is Taal an Taofel op 23 oktober, 27 november, 26 febrewari (2023) en 26 meert (2023). Risserveren kan via reina.zwiers@planet.nl.