Moi Forum! – Veur Mekoar

Centrum Groninger Taal & Cultuur (CGTC) lanceert zotterdag 20 meert n nije talkshow in en over de Grunneger toal: Moi Forum! – Veur Mekoar. Centroal thema van de uitzenden is t gebruuk van t Grunnegers in dizze tied en in de toukomst. Presentator Arno van der Heyden proat tiedens zien wandeling deur t Forum mit verschillende gasten dij wat biezunders doun mit t Grunnegs en biezundere Grunnegers. Wat veur biezunders gaait beveurbeeld de nije stadsdichter Myron Hamming doun? Wat binnen poaskebloumen en noakende wiefkes persies? En hou smoakt kluunbier noa n optreden van Steernvanger? n Poar vroagen doar Arno antwoorden op hoopt te vinden tiedens de talkshow Moi Forum! Veur Mekoar. De talkshow wordt om acht uur ’s oavends rechtstreeks oetzonden en ‘streamd’ via Platform F, t online platform van t Forum.