Klaas Kleine-lezing in de olde kerk in Diever

Zundagmiddag 23 oktober stiet in de olde kerk in Diever het wark en leven van Klaas Kleine centraal. Um 14.00 uur begunt een pergram van veurdrachten en muziek. En is der een kleine rondleiding deur het dörp under leiding van de historische vereniging.

Klaas Kleine was een bekende inwoner van Diever. Hij was under meer hoefsmid, siersmid, geitenfokker, vioolbouwer, tonielspeuler, dichter, vertaoler, koster en kerkvoogd. Hij wur in 1940 op Kolderveen geboren en gruide op in Möppelt. Op 24 oktober 2000 is Klaas Kleine nao een zwaore ziekte oet de tied kommen. Hij schreef dartien Dryloeken. Dat waren kleine brochures, met dree gedichten die vrienden en bekenden elk jaor in jannewari in de brievenbus kregen. De leste twei Dryloeken staon tiedens de lezing centraol.

Schrievers Lukas Koops en Marga Kool vertelt over het leven en de “schrieverij” van Klaas Kleine. Oetgever Bert Rossing van Het Drentse Boek introduceert de neie literaire wandelserie Underweg. Diel 1 giet over Klaas Kleine en Diever. De schrievers hiervan, Gerrit Boer en Henk Berghuis, praot over het belang van en het idee achter de literaire wandelserie. De muzikaole understeuning komp van Leonieke Stoering en Jan-Roelof Bathoorn. Frans Jansen van de historische vereniging zal nao ofloop de wandelroute deur Diever begeleiden. Publiek is van harte welkom. De entree is € 7,50. Kaorten kunt risserveerd worden op www.huusvandetaol.nl/Kleine-lezing.