Kielzog en CGTC presenteren nij Grunneger Festival: GRN

Laifhebbers van de Grunneger taal, goud opletten! Op zotterdag 13 november is Kielzog Hoogezaand t decor veur n nij Grunneger festival: GRN. De Dag van de Grunneger toal mit hail veul meer: n streektoalfestival mit n mirreg- en oavendprogram over onze toal in de braidste zin. Inclusief oetlangen van n nij prestigieuze pries veur de mainst sproakmoakende Grunneger kunstenmoaker: de Haide Bliksem Award.

De Dikke Week van t Nedersaksisch
GRN, spreek oet as Grunnen, wordt organiseerd deur Kielzog en Centrum Groninger Taal & Cultuur (CGTC). t Festival is ook de officiële Grunneger ófsloeten van De Dikke Week van t Nedersaksisch. Inrichten van Het Huis voor Cultuur en Bestuur en Kielzog laint zok meer as prima veur t beste van de Dag van de Grunneger toal. Boeten is stoef bie meer as genog roemte om te parkeren en dat din ook nog ais vergees. Binnen is n roeme ontvangsthal, mit aan d’aine kaant de openboare biebeltaik en aan ander kaant t Grand Café. Wiebe Klijnstra presenteert n literaire talkshow. Der is de Boukenmaarkt, t Sproaklab van Martijn Wieling, n speurtocht in t kader van de 150ste geboortedag van K. ter Loan. Krzysztof Groen treedt op en der binnen lezingen, films, tentoonstellingen, veurdrachten en nog meer optredens. Der is n literair café mit n pubquiz en Jan Groenbroek presenteert dizze dag zien bouk over Lianne Abeln. Doaromtou wordt n feestje baauwd mit Irene Wilkens, Marieke Klooster en Bert Hadders. Zai bringen alle drij n laid van Abeln. En dit alles wordt presenteerd deur Janneke Vos. Ook nait verkeerd!

Lees HIER t complete Dagblad van het Noorden artikel over GRN schreven deur Louis van Kelckhoven.

Haide Bliksem Award 2021
Welk theatergezelschap, schriever, kunstenoar of laidjesschriever gaait ter dit joar vandeur mit de Haide Bliksem Award? De jury beslist welke Grunneger óflopen joar t mainst betaikend het op cultureel gebied. De jury veur t oetlangen van de Haide Bliksem Award bestaait oet Carmen Schilstra (kunstenares), Louis van Kelckhoven (journalist DvhN), René Walhout (RTV Noord) en Bente Louwrier (jongerendirkteur Kielzog).

Lees meer over GRN en de Haide Bliksem Award op de website van Kielzog.
Binnenkört is t GRN programma compleet. Hol www.cgtc.nl  in de goaten!

Foto: Bert Hadders en de Nozems XL treedt ook op bie GRN.