Elke twee jaor organiseert streektaolorganisatie Huus van de Taol een schriefwedstried. In het verleden was dat een Drentse angelegenheid, maor sinds twee jaor is het een Nedersaksische schriefwedstried. Zaoterdag 2 april was der een feestelijke priesoetrieking in het gemientehoes van Beilen. De eerste pries gung naor Ingeborg Nienhuis oet Veerhoezen (previncie Grunning). Zij kreeg veur 250 euro an dinerbonnen, een boekenpakket en gien beker, maor een geel taofeltie.

De schriefwedstried van 2021-2022 har as thema ‘De gele taofel’. Schrievers muchten zölf weten of ze een taofel de hoofdrol gaven, figureren leuten of wat der tussenin. Dat het thema töt de verbielding sprak was dudelijk; der bint umdebij zestig verhaolen instuurd en de inzendingen kwamen oet het hiele Nedersaksische taolgebied.

In de eerste ronde bint de geanonimiseerde verhaolen deur de manuscriptencommissie van het Huus van de Taol lezen. Twintig verhalen gungen deur naor de tweede ronde. Een viefkoppige jury hef zuch over dizze verhaolen beugen. De juryleden waren vertegenwoordigers van alle grote Nedersaksische organisaties. Het was al snel dudelijk dat veur de volwassenen twee priezen te weinig was; daormit zulden schrievers tekörtdaon worden. Daorum bint der ok dree eervolle vermeldingen vergeven.

  • Eerste pries: Ingeborg Nienhuis (Grunning)
  • Tweede pries: Are Meijer (Grunning)
  • Jeugdpries: Céleste Tukker, 12 jaor (Drenthe).
  • Eervolle vermelding: Martin ter Denge (Overiessel), Reinder Willem Hiemstra (Grunning) en Ina Fischer (Overiessel).