Huus van de Taol viert Meertmaond – Streektaolmaond met een dubbele jubileumeditie!

Umdat streektaolorganisatie Huus van de Taol op 1 meert 15 keersies oetblaozen mag, duurt dit jaor de Meertmaond – Streektaolmaond dubbel zo lang! In meert én april staot er een hiele koppel activiteiten op de agenda.

Wiesneus
Op woensdag 2 meert trapt het Huus van de Taol de maond of met de feestelijke overhandiging van het eerste exemplaor van kindertiedschrift Wiesneus an gedippeteerde Nelleke Vedelaar. De Wiesneus giet dit jaor in een oplage van 30.000 stuks de previncie in, naor zowat alle basisschoelen.

Podcast ‘Praot Drents met mij’
Van de succesvolle Drentstaolige podcast Praot Drents met mij is weer een nei seizoen opnummen. Op woensdag 2 meert giet de eerste oflevering met zangeres Martijje online, op 9 meert volgt die met gedippeteerde Henk Brink en zo komt er nog acht ofleveringen achteran.

Preek van de Leek
Op zundag 6 meert gef directeur Renate Snoeijing op Klazienaveen een Preek van de Leek op oetneudiging van de oecumenische warkgroep. De toegang is gratis.

Drents Parlement
Veurig jaor weur der in het Drents Parlement in meert in de streektaol vergaderd. Dit jaor komp der een vervolg en kriegt de parlementsleden op woensdag 9 meert een broescursus Drents. In een informele kwis mugt ze daorna zien laoten hoe goed ze het Drents beheerst.

Webinars
Ok dit jaor bint er weer een koppel webinars. Op woensdagaovend 9 meert stiet Streektaol in de zörg op het programma, op 30 meert vertelt Henk Nijkeuter over de Drentse schrieverij vanof de 19e eeuw en op 13 april nimt streektaolfunctionarissen Arja Olthof en Amber Tieck je in vogelvlucht met deur de Drentse spelling.

Streektaolstrieden
Op vrijdag 18 meert wordt er in Börk een streektaolstried holden. Datzölfde gebeurt op vrijdag 25 meert in Nieveen en op vrijdag 1 april in Zeijen. In dizze Drentse pubkwissen wordt vraogen steld over de streektaol, maor u.a. ok over de gemiente, geschiedenis, cultuur, meziek en actuele zaken.

Taal an Taofel
Op zundag 20 meert in Noord-Slien en op zundag 27 meert in Dwingel kunt liefhebbers van de Drentse taol heur hart ophalen met poëzie, proza en meziek.

LOOS!
De oetzendingen van streektaolkwis LOOS! begunt dit jaor op dunderdag 31 meert bij RTV Drenthe. Nao een jaor van ofwezigheid is LOOS! weer terug op de tillevisie!

Drents Praothuus
De vrijwilligers van het Huus van de Taol in Assen hebt vanof meert tot september een eigen praothuus in warenhuus Vanderveen in Assen. Hier organiseert ze allerhande activiteiten.

Umdat er begun van het jaor nog gien dudelijkheid was over het wal of niet deur kunnen laoten gaon van een grote feestelijke activiteit bij het Huus in Beilen, is besleuten um dizze plannen hen september te verpoten. Hierover volgt binnenkört meer neis.

Veur de bijgewarkte agenda, neis en alles over het Drents kuj terecht op de website van het Huus van de Taol.

Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers groots op bint en die de niet-gebroekers waardeert.