Grunneger woordenposter Vlaigen boven Grunnen overhandigd aan Olaf Vos

De nije Grunneger woordenposter Vlaigend boven Grunnen is vandoag presenteerd. Op CBS Anne de Vries in Knoal kreeg Olaf Vos van Centrum Groninger Taal & Cultuur t eerste exemploar overhandigd deur ain van de initiatiefnemers Theo Zwinderman. Dit gebeurde tiedens n biezundere les biologie aan de leerlingen. Dij was noamelk in t Grunnegs.

Grunneger vogelwoorden
Vlaigend boven Grunnen is n poster bedould om Grunnegers, jonkluu en oldere Grunnegers, bewust te moaken van de riekdom van Grunneger vogelwoorden. De poster vol kleuren is n aanwiesploat, de Nederlandse en Grunneger vogelwoorden stoan noast nkander.
Noast de poster is der ook n website ontwikkeld mit lezzen in t Grunnegs en vogelgeluuden.

Vogelcollage
Veurege wonsdag wörren eerste lezzen Grunnegs veur groep 4/5 van CBS Anne de Vries geven en vanmörn kregen de leerlingen van groep 6 ook n les Grunnegs. De lezzen gingen over de Grunneger toal en over biologie.
Veur de klas ston Theo Zwinderman, kunstenoar van beroep. Soamen mit hom moakten de leerlingen van groep 6 n vogelcollage. Doarnoast was der t officiële moment van lancering en kreeg Olaf Vos t eerste Vlaigend boven Grunnen oetlangd. Olaf Vos: ‘Dit project is ook weer n prachteg veurbeeld van hou of we zain en heuren loaten kinnen hou mooi onze toal is. Woorden as hoanebieter en iempikkertje binnen bie de kinder nait bekend. Mor noa vandoag waiten de kinder van dizze klas om welke vogels t gaait. n Prachteg initiatief van de bruiers Zwinderman!’

Achtergrond
De bruiers Theo en Jakob Zwinderman oet Pekel hebben noa 25 joar weer n nije Grunneger woordenposter oetbrocht. Van drij eerdere succesvolle posters binnen meer as 4000 stuks verkocht. t Moaken van de poster Vlaigend boven Grunnen wör meugelk deur n subsidie van Stichting Kunst & Cultuur. De poster is voor elkenain te koop onder andere via de website.

Wozzen joe dat…
Twijtoaleg zien invloed hebben kin op ontwikkeln van dementie? Minsen dij op jonge leeftied twij toalen of meer leren, kriegen voak op loatere leeftied geheugenklachten as minsen dij mor ain toal leerd hebben (bron: Alzheimer Nederland). Lifelines dut op dit moment ook onderzuik noar t spreken van meerdere (streek)toalen en mentoale gezondhaid.