Geslaagden Wiesneus-les met live muziek

Waor wodt d’r eigelek allemaole Nedersaksisch epraot en waor Achterhooks? Dat völle woorden in ’t plat vake als ‘ao’ wodt uut-esprokken en da’j op dialectrock lekker kunt høken. Dat leren kinder van groep vief en zes van basisschool Christoffel in Gendringen tiedens dialectles Wiesneus. Speciaal veur dissen les werden de Wiesneus-liedjes live in de klasse espöld deur countryzangers Sandra Vanreys uut Aalten.

As Ria te Kolste, dee ’t uurtjen Wiesneus gif in Gendringen, vrög an de klasse wier olders thuus nog plat praot, stekt vief of zes kinder de hand op. De opa’s en oma’s van zeker de helft van de klasse blik ’t Nedersakisch nog machtig te waen. ’t Gif maor an hoe belangriek de Wiesneus-lessen bunt dee op initiatief van Erfgoedcentrum Achterhook en Liemers wodt egeven deur bibliotheekmetwarkers in den Achterhook.
“Wi-j geeft dissen les umdat wi-j ’t belangriek vindt dat kinder nog ’n betjen plat könt praoten”, vertelt Ria tegen de kinder, um d’r metene an toe te voegen dat ze ’t zölf ok best moeilek vind um plat te praoten tegen kinder. “Ok tegen die van mienzelf vrögger. Eigenlek hartstikke jammer.”

Dreumen
Tiedens de Wiesneus-les könt de kinder toch ’n betjen an hun eigen streektaal roeken. Ria leert ze dat klinkers in het dialect vaak verandert. Zo wodt de ‘ij’ vaak ‘ie’, ‘a’, wodt ‘ao’ en de ‘e’ wodt ‘ae’. “Gin ijs maor ies, praten wodt praoten en lezen is laezen”, doceert Ria. As Sandra Vanreys, die de Achterhookse Wiesneus-liedjes veur de website inzong, vervolgens met eur gitaar ’t liedjen Klokslag Zeuven zunk, laest de kinder andachteg met in ’t Wiesneus-tiedschrift. Ok de opdrachten wodt enthousiast emaakt en de les wodt beslotten met ’n pötjen olderwets høken op ’t nummer Wakker Worden van Jovink en de Voederbietels. Ria en Sandra rockt enhousiast met.

Zäödjen eplant
“Superleuk om dit te leren”, reageert de leerlingen naotied. Aover wat noe ’t mooiste Nedersaksische woord is dat ze tiedens de les hebt eheurd, bunt de meningen verdeeld. Duunknien, dreumen, stetjen, stoefzand en heurkes wodt enuumd. Duudelek is dat hier ’n zäödjen um dialect te gaon praoten, is eplant. “Ik hoppe en zeg ok altied tegen de kinder dat ze ’t buuksken nog ‘ns mot deurlaezen en an hun olders en grootolders mot laoten zeen”, zeg Ria. “Dan wodt d’r nao de les ok nog ‘ns in of aover streektaal epraot.”

Er is een leuke videocompilatie gemaakt van deze les. Bekijk hem snel op ons YouTube-kanaal!

Meer weten over Wiesneus? Klik dan hier!