Drents op Stee gef stemadvies!

Het actiecomité Drents op Stee, dat al jaoren actief is in de streektaolmaond meert is weer op pad west. Dizze maol niet met het tweitaolig maken van plaotsnaomborden, maor deur een stemadvies te geven.

Daorveur bent in de oflopen nacht op veertig plekken in Drenthe de plaotsnaomborden veurzien van de leus: Kies veur Drents op Stee!

Het mak het comité niet uut op welke partij aj stemt op woensdag 15 meert, maor ien ding stiet veurop: Laot het een stem veur het Drents wezen!

Een stem veur de streektaol. Een taol die meer zichtbaor wezen mut in de openbaore ruumte as het an Drents op Stee lig. Dat begunt met tweitaolige plaotsnaomborden. Der bent al vief dörpen in Drenthe die dat hebt. Maor der kunt nog meer dörpen bij, net as streektaol in kraanten en op webstee’s, maor ok in de vörm van poëzie in het straotbeeld, om maor ies wat te numen.

Drents op Stee verbetert al een jaor of wat een koppel plaotsnaomen: in 2014 Grollo/Grol, Orvelte/Örvelt en Dwingeloo/Dwingel, in 2015 Sleen/Slien, De Wijk/De Wiek, Grollo/Grol (weer), Odoorn/Oring en Langelo/Langel, in 2016 Smilde/De Smilde, Westerbork/Börk, Exloo/Exel en Buinen/Bunen, in 2017 Roderwolde/Rowol, Wijster/Wiester, Zweeloo/Zweel en Ekehaar/Ieghaor, in 2018 Westdorp/Wespert, Wezup/Wisp en Hijken/Hieken. In 2019 maor liefst twaalf: Roden/Roon, Ter Aard/Traord, Hooghalen/Haolen, Geeuwenbrug/De Gowe, Meppel/Möppelt, Ruinen/Rune, Stuifzand/Stoefzaand, Oosterhesselen/Hesseln, Nieuw-Dordrecht/Nei-Dordt, Nieuw-Buinen/Bunermond, Rolde/Raol, Zuidlaren/Zuudlaoren. En in 2022 Eelde-Paterswolde/ Eel-Potterwol, Zuidlaarderveen-Zuudlaorderveen, Eelderwolde-Eelwol, Donderen-Dundern, Taarlo-Taorl, Midlaren-Midlaoren, Bunne-Bun, Winde-Win, Tynaarlo-Tynaorl, De Groeve-De Grouve, Oudemolen-Olmeul, Yde-Ie, Zeegse-Zees, Vries-Vreeis en Zuidlaren-Zuudlaoren.